弄堂里个大伏天_热点

弄堂里个大伏天

创始人

2025-07-27 15:06:55

0次

◆ 陈日旭

今年热天来得早，热得凶，6月份个高温天数就破了150多年个纪录。由此，想起阿拉小辰光过大伏天个场景，也蛮有劲个。

伏天午后，老房子里个大人们大多要睏中觉，斜气安静。阿拉兄弟几个睏勿着，赤膊，每人一把蒲扇，到天井里白相。天井里摆着几只盛满清水个汏浴木盆，搿是防木盆干裂个土办法。实在热煞了，老二想出歪点子，拿扇子蘸水朝我背上扇，还喊“台风来喽！”嘿，有风有水，顿时凉快。大家蘸水互扇，一道喊“台风来啦！”搿辰光，厢房间阿姨出来讲：“快点覅吵了！阿拉要上夜班，要睏一歇哦。”阿拉只好到大弄堂里去白相。

下半天三点多，弄堂口响起“嗒啷、嗒啷”铃声，阿拉晓得是卖马奶个来了。一匹白马，披块青布；卖奶人身材敦实，拿马牵到开阔处停下。搿搭有户开肉店个，伊个姆妈身体勿好，是买马奶个老主顾。挤奶辰光，阿拉小人就抢好位置蹲下来看。挤奶人左手端只纱罩搪瓷杯，右手挤奶到杯中，再倒入客人个小锅，收钱。

天热没胃口，夜饭顶欢喜“冷开水淘饭加酱菜”。小菜一般是糖醋大蒜头、酱瓜、什锦酱菜，假使有毛豆子炒萝卜干就格外下饭。有辰光后弄堂来了挑担卖豆腐花个，买来淘冷饭，绝对是美味。

大伏天最后一档“节目”是乘风凉。落日余晖还没收拢，家家户户就搬出躺椅板凳“占地盘”，一长溜摆满上街沿，摇蒲扇茄山河。

我小辰光喜欢下象棋，乘凉时要么自家摆摊跟伙伴“横车跃马”，要么赤膊到附近棋摊轧闹猛看手谈，棋局精彩时轧出一身臭汗是常事。回家辰光，车辆行人少了，红绿灯关脱，交警也下班了，有空旷地方“小热昏”敲小锣招揽观众，我熬勿牢看一会，回去再揩身、扒冷饭……

几十年一晃过，小辰光个大伏天往事，是一生忘勿脱个记忆。

上一篇：厚皮赖脸“邓禄普”

下一篇：国铁沈阳局开行东北今年首趟“球迷专列”：坐专列看“中超”

弄堂里个大伏天

相关内容

热门资讯