城里冒出油菜花
◆ 邵天骏
讲到春天个美景，经常会提起乡间大片大片个油菜花。其实散落了城市边边角角个零星油菜花也蛮有看头个。
油菜花是最有集体观念个，单株个油菜花往往看起来不起眼，一旦组成一片花海，却能营造出一方绝美空间。于是，一片片油菜花田，就成了上海市民心里向欢喜个地方。
可惜因为大城市往往绿化空间有限，整片个油菜花难以在高楼大厦间立足，不过，只要聚起十几株、几十株油菜花，同样可以展现出顽强个生命力。在我经常走过个马路边，油菜花总会在勿经意间闯进我个视野，带拨我惊喜与感动。走近一看，还能看到蜜蜂辣花丛里飞来飞去。看到搿种风景，我个心情往往会一下子开朗起来。
金黄色个油菜花，呒没大红大紫那么热闹，也呒没牡丹、月季那么绚丽，却有一种典雅动人个感觉。一小片油菜花，辣了蓝天白云之下，同样显眼得勿得了，就算落雨天，雨水淋辣伊身浪，也是风姿飒飒个，勿会坍台。
我常常想，春天从三月下旬开始，就进入到花草迷人个季节了，可以讲百花齐放，争奇斗艳。尤其辣了上海，城市绿化做得斜气好，街头路边从不缺各种各样精心培育个植物花卉，可惜上海市民个眼光也斜气高，交关美景侪辣了勿知勿觉当中被忽视了。要是油菜花呒没自家个鲜明特色，是绝对勿可能自成一景个。
有一日，我搭朋友闲聊，伊勿经意中讲起：“马路边个风景，为啥总归会有油菜花个影子？”我想可能有两方面原因，一方面是因为油菜花有较强个环境适应能力，另一方面是因为有交关人欢喜伊。
辣交关文学作品里，作家描写世外桃源个春天，会用白墙黛瓦、桃红柳绿、花团锦簇、阡陌纵横，以及金黄色个油菜花海。由此可见，油菜花个金贵，油菜花个美丽，是受到古往今来交关文人墨客共同认可个。
我欢喜生长辣上海马路边个油菜花，尽管伊往往只占用了一小块地方，却依然尽情展示独有个温婉与风情，决不辜负大自然个厚爱。无论生长环境如何变化，侪要把自己最美好个一面展现出来。