◆ 沈一珠

“阳春应有脚”迭句，来自南宋诗人白玉蟾个《立春》，“从此阳春应有脚，百花富贵草精神。”太生动了，果然三四月天气，春天气息像有脚一样，所到之处，花越来越富贵，草越长越精神，也包括饭台子上鲜灵灵个小菜，又鲜又香。

搿趟买个茉莉花香气足，打开包装个辰光，清新个香气，扑面而来；水里浸一浸，一朵朵雪雪白、软乎乎个花苞里，寻出零星几朵变灰个，厾脱；十几分钟后，吃足水分，又有花苞要开出来个样子，拎出来，撒点盐，轻轻交掿一掿，腌个三五分钟，冲清爽，沥干；香味道赛过拨盐激出来了，更加浓了，闻闻，手指头上沾着了。

炒菜之前，拿茉莉花用开水焯一焯，科学点讲，是因为新鲜茉莉花里含仔交关鞣酸之类，对肠胃勿友好；口感上讲，吃上去会有点苦隐隐，勿讨人欢喜；其实，春天辰光交关新鲜小菜侪有点青涩苦味，顶典型个就是清炒枸杞头，常常要多摆一把糖；但是，阿拉老祖宗向来认为，药食同源，葛末，就当伊良药苦口好了；所以，一年一逢春天，难板吃一趟新鲜，就尽量保持原样好了，更何况，多一道处理，对新鲜因子就多一次伤害。

茉莉花是有食用价值个，具有理气和中、开郁辟秽、清热利湿个作用。顶顶古老、常见个食用方式就是窨茶，拿茉莉花苞摘下来，跟茶叶摆了一道，茉莉花开个辰光吐香气，茶叶吸饱花香，10到12个钟头以后，拿吐完香气个花苞厾脱，茶叶烘干就好；五窨，就是迭能来五趟；七窨就是七趟。多来几趟，会更加香一点，至于浓香好还是淡香好，搿就各人欢喜了。

准备工作侪做好，操作起来就简单了。打三四只草鸡蛋，摆黄酒、盐打匀，蛋液里放一点白酒更香，放一点凉开水炒出个鸡蛋更嫩。开油镬，中火，蛋液倒下去，推一推、划一划，看伊有一点点结起来，处理好个茉莉花倒下去，跟蛋一道翻炒均匀，等茉莉花稍许有点变颜色就好盛出来了。

果然，迭一碟子茉莉花炒蛋，香是香个，苦也有点个。