◆ 沈一珠

一碟咸菜配一碗白饭有时就是人间至味。讲到咸菜，上海人有句老段子，阿拉从小听到大。

有人去宁波人家做客，到了饭点，宁波阿娘格外热情，执意留饭，开口一台子小菜：咸鸡、慈姑、肉，蛋搳搳（打蛋），小菜呒搞，白饭吃饱。客人一听斜气捂心，介许多小菜还讲呒没小菜，宁波阿娘客气。结果，阿娘端上来一碟雪里蕻咸菜、一碗白饭……

原来是阿娘个一口宁波方言带来个误解：咸菜（咸鸡）自家（慈姑）掿（肉），蛋搳搳（淡刮刮），小菜呒啥，白饭吃饱。宁婆阿娘真个呒没骗侬。其实摆辣从前饿肚皮个辰光，一碟咸菜一碗白饭就是人间美味。就算是摆辣现在，酒足饭饱之后，吃一碗咸菜泡饭，既能解腻又能醒酒，是一碗人间清醒。

小满节气过后，天热起来了，又闷又潮。孵辣屋里，勿光空调已经要开除湿模式，人个胃口也有点搁牢，迭个辰光，顶好吃一碗咸菜豆瓣汤配一碗白饭，假使再腌一碟香糟大虾就更加好了。

所以早上走过迭家熟悉个小菜店，哦哟，店外头新搭了棕白条纹个遮雨棚，既可以遮阳又可以避雨，对顾客侪是斜气友好个；看见低头坐辣打游戏个小老板，脚旁边堆仔一筐大蚕豆，顿时就想起了豆瓣咸菜汤个味道。叫伊称了2斤左右，迭种豆烧葱油蚕豆勿来三了，剥出来烧豆瓣汤顶好；咸菜是前两日买个宁波减盐咸菜，切碎个，茎与叶个比例适中，还淡刮刮，（烧前头）用勿着事先泡水；大热天来了，备一点辣灶披间里，炒点毛豆子、肉丝甚至蒸鱼，侪是提鲜去腥个必备配料。

咸菜豆瓣汤做法：

豆瓣下锅焯水，捞出过冷水，去掉豆腥，颜色也能保住碧绿。起油锅，下咸菜、葱姜一同煸炒，炒出香味。倒入高汤或清水，烧开后煮两分钟。放入焯好个豆瓣，再煮两分钟，等到豆瓣微微绽开就可以了。咸菜本身有咸味，盐一定要少放；加少许糖提鲜，撒上一点白胡椒增香，就能出锅了。盛上一碗热乎个白饭，搭配着吃，滋味绝佳。

最后悄悄讲一句，吃中餐最要紧个诀窍：一定要趁热吃！