红枣桂圆小米粥
◆ 沈一珠
红枣、桂圆……迭几样物事，入冬后，交关人家屋里侪会备一眼，有单位里发的，也有自家买的——眼门前就要天冷了，难免飘两片雪花或者落两滴冷雨，又齐巧，情绪也碰着一点点季节冷……葛末就来一碗软糯甜香个红枣桂圆汤；尤其是年纪越来越大，欢喜的事体偏偏越来越少，越来越欢喜吃点甜食好像也算是自动自发个生理调节，理论依据是，甜食当中个糖分可以快速转化为能量，刺激大脑释放多巴胺搭仔血清素，会让人觉着开心。
所以，大冷天早上，偶尔可以烧一锅红枣桂圆小米粥，是进补，也是调节心情。红枣桂圆补心血，养精神，小米养护肠胃，烧成粥后咸甜适中，可适当改善气血亏虚，失眠多梦。
红枣桂圆小米粥原料：准备小米100克，淘清爽浸泡半个钟头；红枣三四只，汏清爽去核切成丝；桂圆肉15克左右，食盐适量。
所有物事一道摆到镬子里，加适量清水，大火烧开，转小火炖半个钟头左右就好吃了。
甜食可以让人开心，只不过迭种吃出来个开心据说也就维持半个钟头左右，因为，血糖迅速降下来之后可能引发烦躁、疲劳等反弹性情绪低落；再吃，再吃，啥结果大家侪懂个。
齐巧看到一段视频，是关于哪能让人走出情绪低潮，拥有快乐；据说蛮要紧个一点就是，要运动，出门走走路，或者踏踏脚踏车，勿要整天孵辣屋里睏觉。
理论依据还是跟多巴胺有关，运动10分钟，大脑就会分泌出各种积极个神经化学物质，包括多巴胺、催产素、内啡肽，抑制杏仁核个活跃；同时大脑还会分泌出一种特别有意义个脑源性神经营养因子，伊可以刺激大脑神经元重塑，迭个对改善心情有特别大个作用，坚持运动半个钟头就会有比较好个效果。
总结出一条，甜食快乐侪跟多巴胺有关，一个吃进去，一个动出来。其实也就是现在大家常常讲个，管住嘴，迈开腿。
上一篇：如何为一座城市做一台戏？